उस्मानाबादच्या जावई पोलीस उपनिरीक्षकाला ‘लिव्ह इन’ प्रकरण पडले महागात

पुणे  - उस्मानाबादच्या एका  मुलीबरोबर  पहिले लग्न झालेले असताना दुसऱ्या तरुणीसोबत प्रेम प्रकरण करणे एका पोलिस निरीक्षकाला चांगलेच अंगलट आले आहे. तरुणीला लग्नाच्या आमिष दाखवून ‘लिव्ह इन’मध्ये राहून नंतर लग्नास नकार दिला. या प्रकरणी त्या पोलिस उपनिरीक्षकाला निलंबित करण्याचे आदेश अतिरिक्त पोलिस आयुक्त एन. डी. चव्हाण यांनी दिले आहेत.

हिमालय रामचंद्र जोशी असे निलंबित केलेल्या पोलिस अधिकाऱ्याचे नाव आहे. जोशी हे हडपसर पोलिस ठाण्यात नेमणुकीला आहेत. त्यांचे पूर्वी उस्मानाबादच्या एका  मुलीबरोबर  लग्न झालेले आहे. नवी पेठेतील एका मुलीशी ओळख झाल्यानंतर या दोघांमध्ये प्रेमसंबंध निर्माण झाले. डिसेंबर २०१९ पासून संबंधित तरुणी व जोशी हे लिव्ह इनमध्ये राहत होते. मात्र, त्यानंतर त्यांच्यात वाद झाले. त्यानंतर जोशी यांनी त्या तरुणीसोबत लग्न करण्यास नकार दिला.

त्यानंतर संबंधीत तरुणीने भरोसा सेलमधील महिला सहायता कक्षाकडे धाव घेऊन तक्रार दिली. या ठिकाणी दोघांचे समुपदेशन करण्यात आले. त्यावेळी तरुणीने महिला दक्षता समितीच्या सदस्यांसमोर नंतर कोणतीही तक्रार नसल्याचे लिहून दिले आहे.

मात्र, जोशी हे पोलिस दलात अधिकारी असून विवाहित आहेत. तरीही एखाद्या मुलीसोबत प्रेमसंबंध ठेऊन तिच्यासोबत ‘लिव्ह इन’मध्ये राहणे, तिला गर्भपात करायला भाग पाडणे हे पदास अशोभणीय आहे. तसेच, पोलिस दलाच्या प्रतिमेला बाधा आणणारे आहे. त्यांनी केलेले वर्तन पोलिस दलाच्या शिस्तीस धरून नाही.यामुळे पोलिस खात्याची प्रतिमा मलीन झाली आहे. या वर्तनाबद्दल जोशी यांना पोलिस खात्यामधून निलंबित करण्यात आले आहे. या निलंबन कालावधीमध्ये पोलिस मुख्यालय निरीक्षकांकडे दररोज हजेरी द्यावी, असे आदेशात म्हटले आहे.

हिमालय जोशी दुसऱ्यांदा निलंबित

हिमालय रामचंद्र जोशी  यांचे उस्मानाबादच्या एका मुलीबरोबर एप्रिल २०१६ मध्ये लग्न झाले होते. त्यावेळी जोशी गडचिरोलीमध्ये होते. लग्नानंतर अवघ्या सहा महिन्यात जोशी यांनी पत्नीचा छळ  सुरु केला. तिचा गर्भपात केला. इतकेच काय तर कौटुंबिक वादातून तिच्यावर गोळी झाडली. मात्र मुलीने नेम चुकवल्याने गोळी  हुकली होती. त्यावेळी तत्कालीन पोलीस उप अधीक्षकानी  प्रकरण दाबले होते, मात्र सहा महिन्यानंतर तत्कालीन पोलीस अधीक्षक अभिनव देशमुख यांना  मुलीच्या कुटुंबीयांनी भेट घेऊन हिमालय जोशीबद्दल तक्रार दाखल केल्यानंतर गुन्हा दाखल झाला होता. 

गुन्हा दाखल झाल्यानंतर हिमालय जोशी यास निलंबित करण्यात आले होते. त्यानंतर जोशी १७ महिने निलंबित होते. त्यानंतर पुण्यात नवा कारनामा केला आहे.  ‘लिव्ह इन’मध्ये असलेल्या मुलीचा त्यानी दोनदा गर्भपात झाल्याचे कळते. पहिल्या पत्नीपासून घटस्फोट झाला नसताना जोशी यांनी प्रेम प्रकरण करून पोलीस खात्याला काळिमा फसली आहे. जोशी यास पोलीस खात्यातून बडतर्फ करावे, अशी मागणी होत आहे.