माझ्यावर अत्याचार करणारा मेहबूब शेख राष्ट्रवादीचा प्रदेश युवक अध्यक्षच...

औरंगाबाद-  राष्ट्रवादीचा प्रदेश युवक अध्यक्ष मेहूबब इब्राहीम शेख याच्या अडचणी वाढल्या आहेत. गेल्या काही दिवसापासून गायब झालेली पीडित तरुणीने एक व्हिडीओ जारी करून माझ्यावर अत्याचार करणारा मेहबूब शेख राष्ट्रवादीचा प्रदेश युवक अध्यक्षच असल्याचे म्हटले आहे. दरम्यान, विधान परिषदेच्या उपसभापती डॉ. निलमताई गोऱ्हे  यांनी, हे प्रकरण वरिष्ठ महिला पोलीस अधिकाऱ्याकडे देण्याची मागणी केली आहे. 

नोकरीचे आमिष दाखवून एका २९ वर्षीय तरुणीवर बलात्कार केल्याप्रकरणी औरंगाबादच्या सिडको पोलीस ठाण्यात राष्ट्रवादी युवक काॅंग्रेस प्रदेशाध्यक्ष मेहबूब इब्राहीम शेख याच्या विरोधात २६ डिसेंबर रोजी गुन्हा दाखल करण्यात आला आहे. तक्रार दाखल करणारी पिडीत तरूणी ही गेल्या काही दिवसांपासून कुणाच्याही संपर्कात नाही, तिने दिलेला पत्ता देखील चुकीचा असल्याचे एका पोलीस अधिकाऱ्याने स्पष्ट केले होते.. त्यानंतर काल अचानक पिडित तरूणीने एक व्हिडिओ शेअर करत बलात्काराचा गुन्हा दाखल झालेला मेहबूब इब्राहीम शेख हा दुसरा इतर कुणी नसून राष्ट्रवादी युवक काॅंग्रेसचा प्रदेशाध्यक्षच असल्याचे स्पष्ट केले.

२६ डिसेंबर रोजी मी औंरगाबादेत जो एफआयआर दाखल केला आहे, त्यातील व्यक्ती ही राष्ट्रवादी युवक काॅंग्रेसचा अध्यक्ष मेहबूब शेख हाच आहे. तो जे सांगतोय तो खोटं बोलताेय. त्याने माझ्यावर जबरदस्ती केली. मी एक शिक्षित मुलगी आहे. त्यामुळे आता मला जे काही सांगायचे आहे ते मी न्यायालयातच सांगेन, पोलीसांसमोर काहीही सांगणार नाही, असेही या तरूणीने व्हिडिओत म्हटले आहे.

खाजगी शिकवणी घेणाऱ्या बीएड शिकलेल्या तरूणीची ओळख बीड जिल्ह्यातील शिरूर येथील मेहबूब इब्राहीम शेख याच्याशी झाली होती. बीडबायपास रोडवर ट्यूशन घेण्यासाठी खोली पाहत असतांना तिची आरोपीशी भेट झाली होती. तेव्हा तुला मुंबईला चांगल्या ठिकाणी नोकरी लावून देतो, असे सांगून मेहबूब शेख याने सदर तरूणीला सिडको परिसरातील वंसतराव नाईक महाविद्यायाच्या परिसरात बोलावले होते.

कारमध्ये या तरूणाला बसवून तो तिला आपल्याला मुंबईला जावे लागेल असे म्हणत होता. दोघे बोलत असतांनाच त्याने निर्मनुष्य ठिकाणी अंधारात कार नेऊन या तरूणीवर बलात्कार केल्याची फिर्याद तिने सिडको पोलीस ठाण्यात दिली होती. मेहबूब शेख याच्या विरोधात गुन्हा दाखल झाल्यानंतर तो राष्ट्रवादी युवक काॅंग्रेसचा अध्यक्ष असल्याची बातमी पसरली आणि राजकीय वर्तुळात एकच खळब उडाली होती.

दरम्यान, मेहबूब शेख याने आपण पिडित तरूणीला ओळलत नाही, तिच्याशी कधी फोनवरून माझे बोलणे देखील झाले नाही, असे सांगत आरोप फेटाळले होते. आपल्या विरोधात हे षडयंत्र असल्याचा दावा करत आपली नार्को टेस्ट करा, अशी मागणी देखील  केली होती. पिडीत तरूणीच्या दाव्यानंतर आता पोलीस मेहबूब शेख यांचा चौकशीसाठी बोलावणार असल्याची माहिती आहे.

काय आहे प्रकरण ? 

औरंगाबाद शहरातील बायजीपुरा  भागात राहणाऱ्या तरुणीचे बीएडपर्यंत शिक्षण झाले आहे. ती घरगुती शिकवणी घेते. त्या तरुणीला औरंगाबाद शहरातील बायपास परिसरात शिकवणी सुरू करायची असल्याने ती बायपास परिसरात खोली भाड्याने घेण्यासाठी गेली असता. त्याठिकाणी तिची बीड जिल्ह्यातील शिरूर कासारमधील मेहबूब इब्राहिम शेख यांच्याशी भेट झाली.

त्यानंतर तिचे शिक्षण किती झाले विचारून तुला मुंबईत नोकरी लावून देतो असे आमिष महेबूब शेख यांनी दाखवले. १४ नोव्हेंबर रोजी मुंबईला जाण्याचे कारण सांगत त्या तरुणीला जालना रोडवरील हॉटेल रामगिरी समोर बोलावले. रात्री नऊच्या सुमारास रामगिरी हॉटेल समोर पोहोचले असता मेहबूब कार घेऊन त्या ठिकाणी उभे होते.  तरुणी मागील सीटवर बसली असता त्यांनी वसंतराव नाईक कॉलेज जवळ निर्मनुष्य ठिकाणी थांबून तर तिच्यावर अत्याचार केल्याचा आरोप करण्यात आला आहे. याबाबत कुठे वाच्यता केली तर तुला सोडणार नाही' असे म्हणून तिला कारमधून उतरून दिले. घटनेनंतर तरुणीच्या मावशीने धीर दिल्यानंतर सिडको पोलीस ठाण्यात तरुणीने तक्रार केली. याप्रकरणी औरंगाबाद शहरातील सिडको पोलीस ठाण्यांमध्ये अत्याचाराचा गुन्हा दाखल करण्यात आला आहे.

औरंगाबाद येथील बलात्कार प्रकरणातील आरोपी असलेल्या राष्ट्रवादी युवक काँग्रेसच्या प्रदेश अध्यक्षाला सत्ताधाऱ्यांकडून संरक्षण मिळत असल्याने पोलीस आरोपीला अटक करण्यास धजावत नाहीत. आरोपी मेहबूब शेख याला तात्काळ अटक करावी व या गुन्ह्याचा तपास करण्यात ढिलाई दाखविणाऱ्या पोलीस उपायुक्त दीपक गिरे यांना तातडीने बडतर्फ करावे, अशी मागणी भाजपा प्रदेश उपाध्यक्ष चित्रा वाघ यांनी केली आहे.    

हाच तो व्हिडीओ .. ऐका..